Arrestohet në Merdar një serb

Shërbimi Informativ i Serbisë (BIA), në bashkëpunim me Ministrinë e Punëve të Brendshme (MUP), ka arrestuar sot(e hëne) në mëngjes Sasha Gjorgjeviqin nga Shtërpca, në pikëkalimin kufitar në Merdar.

Arrestimi u zhvillua me prezencën e kamerave, duke u paraqitur si një aksion i profilit të lartë.

Sipas raportimeve të mediumit serb “Kosovo Online”, Gjorgjeviqi dyshohet se ka bashkëpunuar me Shërbimin Informativ të Shqipërisë (SHISH) përmes Agjencisë së Kosovës për Inteligjencë (AKI), dhe se ka ofruar informacione që, sipas pretendimeve, janë përdorur kundër interesave të komunitetit serb dhe të strukturave të sigurisë së Serbisë në Kosovë.

Gjorgjeviq shkruhet se është i punësuar në Qendrën e Mjekësisë Familjare në Shtërpcë.

Siç pretendon mediumi serb, ai “për një periudhë të gjatë ka qenë bashkëpunëtor i Shërbimit Informativ Shtetëror përmes Agjencisë së Kosovës për Inteligjencës, sipas detyrave të së cilës ka ndërmarrë veprime të drejtuara kundër interesave të komunitetit serb në Kosovë dhe të Serbisë në atë rajon, si dhe në drejtim të mbledhjes së të dhënave për pjesëtarët e strukturave të sigurisë serbe”.

Për këto shërbime që pretendohet se i ka kryer ai, “Kosovo Online” shkruan se “ka marrë para nga shqiptarët”.

Shërbimet serbe “kanë konstatuar se Gjorgjeviq ka qenë në kontakt me një pjesëtar të AKI-së nga Ferizaj, ish-pjesëtar të UÇK-së”.

Atij i është caktuar masa e ndalimit prej 48 orësh, pas së cilës ai pritet t’i dorëzohet prokurorisë kompetente me kallëzim penal, për shkak të ekzistimit të dyshimit të bazuar se ka kryer veprën penale të spiunazhit.