Skandali i rezervave shtetërore: Ish-sekretari i MINT po intervistohet nga Prokuroria Speciale
Ish-sekretari i Ministrisë së Industrisë, Irfan Lipovica, është ftuar për herë të dytë për intervistim nga Prokuroria Speciale e Kosovës
Lipovica ka hezituar të flas nëse është thirrur për intervistim në rastin e rezervave shtetërore, ndërkohë avokati i tij tha se nuk e dinë arsyen e ftesës.
“Është vetëm një ftesë. Nuk e dimë as për çka është një ftesë për intervistim, kjo është intrvistimi i dytë, nuk e dimë as për çfarë rasti është”, tha avokati i tij për Sinjalin.
Lipovica është një nga tre të dyshuarit për këtë rast, ndërsa të dyshuar janë edhe afaristi Ridvan Muharremi dhe zyrtari tjetër Hafiz Gara.
Përveç veprës penale për keqpërdorim të pozitës apo autoritetit zyrtar, sipas informacioneve të Sinjalit, ndaj tij është shtuar edhe një vepër tjetër penale ajo e zbulimit të fshehtësisë zyrtare.
Hetimet për këtë rast po thellohen, ndërkohë që pritet që organet e drejtësisë të zbardhin në tërësi skandalin rreth rezervave shtetërore, çështje kjo qe ngjalli reagime të shumta publike dhe politike
Ndryshe, në lidhje me rastin e rezervave shtetërore, Prokuroria Speciale e Kosovës (PSRK) e ka thirrur kryeministrin Albin Kurti të paraqitet në ambientet e PSRK-së si dëshmitar, por ai ende nuk është paraqitur duke kërkuar që të intervistohet në Zyrën e tij.
