Dy skenarët e mundshëm pas 8 gushtit

Ish-diplomati Avni Arifi ka komentuar situatën politike në Kosovë dhe ka paralajmëruar se pas 8 gushtit, vendimi i Gjykatës Kushtetuese mund të përballet me sfida të reja.

Arifi për GazetaBlic tha se partitë politike po presin me padurim interpretimin e Kushtetueses, duke theksuar se tashmë ato nuk janë të fokusuara te opinioni i ambasadave, por te vendimi i Gjykatës.

Sipas tij, nëse interpretimi i Kushtetueses nuk do t’u pëlqejë, ato mund të hedhin akuza se nuk është bërë interpretimi i duhur, ashtu si ndodhi në raste të kaluara.

Arifi beson se pavarësisht se Kushtetuesja mund të japë një vendim të qartë, është e mundur që ky vendim të sfidohet dhe të vazhdojë të ngrejë polemika politike.

“Po e presim vendimin e Gjykatës Kushtetuese, megjithëse vetëm interpreton. Më herët pritshin se çfarë po thojnë ambasadat, tash ato nuk po merren më me Kosovën dhe partitë politike janë duke kërkuar një patron të ri, pra, krejt po presin se çfarë po thotë Kushtetuesja, nëse thotë diçka që s’iu pëlqen atëherë, thonë se nuk e ka interpretuar mirë, si në rastin e fundit, çdo gjë ke e interpretuar mirë por nuk iu pëlqejë atyre, prapë do të kemi vendim të Kushtetueses dhe sipas të gjitha gjasave do të sfidohet”, tha Arifi.

Ndërsa, analisti politik, Arbnor Sadiku, ka theksuar se pas 8 gushtit, Kosova do të përballet me dy skenare të mundshme.

Sipas tij, pozita ka ndërmend të dërgojë vendin në zgjedhje të jashtëzakonshme, duke kërkuar kështu një ripërtritje të procesit politik.

Nga ana tjetër, sipas tij, liderët opozitarë, si Krasniqi dhe Abdixhiku, po shpresojnë se Gjykata Kushtetuese do t’u japë të drejtë dhe do të interpretojë ligjin në favor të tyre.

“Pas 8 gushtit, janë dy skenare që në një formë ose tjetër i kemi dëgjuar prej partive politike, pozita synon që vendin ta dërgoj në zgjedhje të jashtëzakonshme me zgjedhjet lokale, ndërsa dy Krasniqi dhe Abdixhiku kanë shpresuar që Kushtetuesja do t’i japë të drejtë atyre, andaj mbetet që Kushtetuesja të vendosë në mesin e këtyre dy skenareve”, tha Sadiku për GazetaBlic.

Kujtojmë se,  ka hyrë në fuqi masa e përkohshme e vendosur nga Gjykata Kushtetuese e Kosovës që ndalon deputetët e zgjedhur të ndërmarrin çdo hap drejt formimit të legjislaturës së re deri më 8 gusht.

Kjo masë erdhi si pasojë e skadimit të afatit 30-ditor që përfundoi më 26 korrik, brenda të cilit duhej të formohej Kuvendi i ri i Kosovës.

/GazetaBlic/