Hoti paralajmëron krizë për bizneset: Vendimi i ZRRE-së mund të rrënojë ekonominë

Ish-kryeministri i Kosovës, Avdullah Hoti, ka reaguar ashpër ndaj vendimit të Zyrës së Rregullatorit për Energji (ZRRE) për daljen e bizneseve në tregun e hapur të energjisë, vendim që hyn në fuqi nesër.

Sipas tij, ky hap do të krijojë pasiguri të madhe për furnizimin me energji elektrike për bizneset vendore.

Hoti e ka quajtur këtë vendim të “pakupimtë” dhe të marrë pa konsultime me komunitetin e bizneseve, duke paralajmëruar pasoja të rënda ekonomike.

Ai ka listuar një sërë rreziqesh: largim të investitorëve ekzistues, mungesë të investimeve të reja, rritje të kostove për bizneset, humbje të konkurrueshmërisë së produkteve vendore, rritje çmimesh për qytetarët dhe shtim të papunësisë.

Sipas Hotit, ky vendim do të përkeqësojë bilancin tregtar të Kosovës, duke lejuar që produktet e huaja të pushtojnë tregun vendas.

Ai e ka cilësuar këtë hap si arbitrar dhe të diktuar nga “Qeveria e mashtrimit”, që sipas tij, nuk është në interes të bizneseve kosovare.

“Ky është një vendim që nuk shërben për zhvillimin e ekonomisë sonë, përkundrazi, e dëmton atë rëndë”, ka përfunduar Hoti.