Ekskluzive: Gjendet pa shenja jete një person në ballkonin e shtëpisë

Një ngjarje e rëndë është raportuar dje në mëngjes në fshatin Ponesh të Gjilanit, ku një person është gjetur pa shenja jete në rrethana ende të paqarta.

Sipas burimeve të Sinjalit, rasti është raportuar pas orës 9:30 në stacionin policor të Gjilanit.

Policia ka dalë në vendin e ngjarjes, ndërkohë që ekipi emergjent mjekësor ka konstatuar vdekjen e personit në vend.

I ndjeri është identifikuar si M.S., por sipas familjarëve ai kishte shkuar për të qëndruar në shtëpinë e tij në fshatin Ponesh ditën e hënë.

Trupi i pajetë është gjetur nga vëllai i tij, në ballkonin e shtëpisë, i mbuluar me batanije, ku dyshohet se mund të ketë qenë në gjumë në momentin e vdekjes.

Me urdhër të Prokurores, rasti është inicuar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore për obduksion.

Rasti është duke u trajtuar nga Njësia për Hetimin e Krimeve të Rënda në Gjilan, dhe hetimet pritet të sqarojnë shkakun e saktë të vdekjes.