Tronditet Kosova: 26 vjeçari tenton ta presë në fyt shokun

Një ngjarje e rëndë ka ndodhur në fshatin Pavlan të Pejë, ku një konflikt brenda familjes ka përfunduar me dyshime për vrasje të mbetur në tentativë.

Policia është njoftuar se një qytetar kishte probleme serioze me djalin e tij, i cili sipas familjarëve po shfaqte sjellje të dhunshme. Patrulla ka dalë menjëherë në vendin e ngjarjes, ku ka takuar ankuesin dhe vajzën e tij.

Sipas deklarimeve, i dyshuari prej disa ditësh po ushtronte dhunë psikike ndaj familjes, ndërsa atë mëngjes kishte sulmuar edhe një shok të tij, i cili ishte larguar nga vendi i ngjarjes.

Viktima ka deklaruar se sapo kishte arritur në shtëpinë e të dyshuarit, ky i fundit i kishte kërkuar të afrohej dhe më pas e kishte goditur me grusht në fytyrë. Pasi ishte rrëzuar, i dyshuari dyshohet se e ka sulmuar me thikë dhe ka tentuar ta godasë në fyt.

Viktima ka arritur t’i shmanget goditjes fatale, por ka pësuar lëndime në dorën e djathtë dhe në zonën e qafës.

Babai i të dyshuarit ka deklaruar se djali i tij ishte kthyer nga Gjermania para tri ditësh dhe se që nga kthimi “nuk është më i njëjti”.

Në vendin e ngjarjes kanë dalë njësia e hetimeve dhe krim-teknika. Me urdhër të Prokurorit të Shtetit nga Departamenti për Krime të Rënda, i dyshuari është ndaluar për 48 orë.

Rasti është iniciuar si “Vrasje e mbetur në tentativë” dhe “Dhunë në familje”, ndërsa hetimet janë në vazhdim.