Sa para fitoi Prishtina nga pjesëmarrja në garat evropiane

Prishtina u eliminua mbrëmë (e enjte) nga Larne në kuadër të kualifikimeve për në fazën e ligës së Ligës së Konferencës.

Meqë ndeshja pas 90 minutave përfundoi baras 1-1, u desh që të shkohet në vazhdime, por as 30 minuta nuk prodhuan një fitues dhe në fund u ekzekutuan penalltitë.

Në penallti më të saktë ishin kundërshtarët nga Irlanda e Veriut, të cilët triumfuan me rezultat 5-4.

Një eliminim kaq i hershëm i Prishtinës nuk pritej fare, sidomos duke marrë parasysh nivelin e kundërshtarit dhe kualifikimi në rrethin e tretë duhet të ishte minimumi për ekipin nga kryeqyteti.

Se niveli i skuadrave nuk ishte i barabartë, e tregon fakti që vlera e ekipit të Prishtinës sipas Transfermarkt qëndron 5.08 milionë euro ndërsa ai i Larnes 2.85 milionë euro.

Pra, sipas përllogaritjeve i bie që vlera e Prishtinës në krahasim me Larnen është rreth 78 për qind më e lartë.

Për pjesëmarrjen e tyre në garat evropiane, Prishtina ka arkëtuar 700 mijë euro, por një kualifikim i mundshëm në rrethin e tretë, do t’i kishte ngritur fitimet e tyre në 1 milionë e 75 mijë euro.

Pra klubi ka marrë 350 mijë euro për dy paraqitjet në rundet kualifikuese dhe 350 mijë euro të tjera si shpërblim pas eliminimit nga gara.

Kujtojmë se Prishtina i nisi garat në raundin e parë të kualifikimeve për në Ligën e Evropës, pas triumfit në finale të Kupës së Kosovës ndaj Llapit.

Aty shorti e vendosi përballë Sheriff Tiraspolit, por të besuarit e Arsim Thaçit u mposhtën me rezultat të përgjithshëm 5-2 pas dy ndeshjeve.

Në Moldavi, Prishtina u turpërua me rezultat 4-0, teksa në ‘Fadil Vokrri’ shënoi një fitore 2-1 që në fund nuk pati ndonjë vlerë.