Dëm prej 20 mijë eurosh nga zjarri në Podujevë

Një zjarr i përmasave të konsiderueshme ka përfshirë një parcelë të mbjellë me pisha dekorative në fshatin Lupç i Poshtëm – Podujevë, duke shkaktuar një dëm material të vlerësuar rreth 20 mijë euro, sipas pronarit.

Burime të Sinjalit mësojnë se ngjarja ka ndodhur më 1 gusht 2025, rreth orës 12:30, kur është raportuar se në një parcelë prej 33 ari të mbjellë me fidanishte është përhapur zjarr, që ka shkrumbuar të gjithë sipërfaqen. Në vendin e ngjarjes kanë dalë menjëherë njësia e zjarrfikësve, e cila ka arritur ta lokalizojë zjarrin, duke parandaluar përhapjen e mëtejshme.

Gjithashtu, në lokacion kanë dalë policia, hetuesia, forenzika dhe eksperti i zjarreve nga Stacioni Policor në Podujevë.

Pas hetimeve fillestare, është konstatuar se shkëndijat gjatë punës me fleks nga i dyshuari Sh.H. rreth 54-vjeçar, kanë qenë shkaktarët e zjarrit, i cili më pas është përhapur me shpejtësi dhe ka djegur sipërfaqen me bimësi dekorative.

I dyshuari është intervistuar nga policia, ndërsa me urdhër të Prokurorit kujdestar, është liruar në procedurë të rregullt. Rasti është iniciuar si “ZJARRVËNJE”.

Po ashtu, është njoftuar NJHP – Prishtinë, të cilët kanë vlerësuar se rasti trajtohet nga njësia e Podujevës dhe nuk kanë dalë në vendin e ngjarjes.