Ish-gruaja rrah burrin

Një tjetër rast i dhunës në familje është regjistruar më 1 gusht 2025 në fshatin Medvec – Lipjan, ku një burrë ka raportuar se është sulmuar fizikisht nga ish-bashkëshortja e tij, me të cilën ndodhet në proces divorci.

Burime të Sinjalit bëjnë me dije se K.M. rreth 28-vjeçar është paraqitur në Polici dhe ka deklaruar se është sulmuar nga ish-bashkëshortja e tij, B.M. rreth 29-vjeçare, me të cilën ka tre fëmijë të përbashkët (7, 6 dhe 2 vjeç). Çifti ndodhet në proces të shkurorëzimit prej më shumë se dy muajsh.

Në cilësinë e të dyshuarës, B.M. është intervistuar nga hetuesit dhe ka mohuar se e ka goditur ish-burrin e saj, por ka deklaruar se nuk dëshiron të largohet prej tij dhe fëmijëve, pavarësisht se burri i ka bërë të qartë se nuk e pranon më në banesë.

Me vendim të prokurorit të rastit, rasti është iniciuar si “Dhuna në familje”, ndërsa palët janë liruar në procedurë të rregullt. E dyshuara është udhëzuar të kthehet tek familja e saj, pasi nuk mund të qëndrojë në banesën e ish-bashkëshortit kundër vullnetit të tij.