E tmerrshme: Gruaja me aftësi të kufizuara mbetet shtatzënë

Një rast tronditës i dhunimit është zbuluar nga autoritetet në komunën e Vitisë, ku një grua me aftësi të kufizuara mendore ka mbetur shtatzënë, ndërsa dyshohet se ka qenë viktimë e një akti të rëndë seksual.

Burime të Sinjalit mësojnë se më 29 prill 2025, Spitali Gjinekologjik pranë QKUK-së në Prishtinë ka njoftuar Policinë se një grua, A.J. rreth 32-vjeçare ishte paraqitur për abort mjekësor, pasi ishte në gjendje të rënduar psiko-fizike dhe kishte deklaruar se ishte shtatzënë.

Pas vlerësimit të rrethanave dhe gjendjes shëndetësore të viktimës, me vendim mjekësor dhe ligjor është kryer ndërprerja e shtatzënisë, ndërkohë që është aktivizuar Njësia e Hetimeve të Përgjithshme në Gjilan, në bashkëpunim me Prokurorinë Themelore, për të hetuar ngjarjen.

Hetimet kanë zbuluar dyshime të bazuara se N.S. rreth 33-vjeçar ka kryer akt seksual me të dëmtuarën, e cila konsiderohet person posaçërisht i ndjeshëm për shkak të kufizimeve mendore.

Sot, më 1 gusht 2025, i dyshuari është arrestuar dhe është shoqëruar në lokalet e NJHP-së, ku është intervistuar në prani të avokatit mbrojtës. Me vendim të Prokurorit të Shtetit, N.S. është ndaluar për 48 orë në Qendrën e Mbajtjes, ndërsa hetimet për grumbullimin e provave shtesë janë në vijim.

Rasti është iniciuar si “Dhunim”, në rrethana veçanërisht të rënda, dhe përbën një nga rastet më serioze të dhunës seksuale që aktualisht po trajtohen nga organet e drejtësisë.