Arrestohet personi që vodhi traktorin në Podujevë

Policia e Kosovës ka vënë në pranga një person të dyshuar për një rast të vjedhjes së rëndë që kishte ndodhur në fshatin Sfeqël të Podujevës.

Sipas burimeve të Gazetës Sinjali, bëhet fjalë për një person rreth 63-vjeçar, i cili dyshohet se më 24 korrik 2025 ka vjedhur një traktor të tipit Massey 250 me rimorkio, pronë e V.V., rreth 40-vjeçar.

Pas denoncimit të rastit dhe hetimeve të zhvilluara nga njësitet përkatëse, më datën 2 gusht është arritur të identifikohet dhe arrestohet i dyshuari.

Ai është intervistuar në prani të avokatit mbrojtës, ku ka pranuar se ka kryer veprën penale.

Traktori i vjedhur është lokalizuar dhe gjetur në fshatin Metergoc, ku edhe është sekuestruar nga Policia si provë materiale.

Me urdhër të prokurorit të Departamentit të Përgjithshëm, Kushtrim Zeka, ndaj të dyshuarit është lëshuar aktvendim për ndalim.

Rasti është iniciuar për veprën penale “Vjedhje e rëndë”.