U ndal për të urinuar, plagoset në sytë e motrës dhe vëllait

Një ngjarje e rëndë është regjistruar pas mesnate në rrugën magjistrale Gjakovë–Klinë, saktësisht ndërmjet fshatrave Kramovik dhe Mrasor në komunën e Rahovecit, afër restorantit “Blini”.

Gazeta Sinjali mëson se më 3 gusht 2025, rreth orës 01:00, është qëlluar me armë zjarri një burrë, i cili kishte ndalur automjetin për të kryer nevojat fiziologjike.

Viktima është Shaban Shala rreth 39-vjeçar, i cili ndodhej në një veturë Mercedes Xhip të bardhë, me bashkëshorten, e cila ishte në rolin e shoferes. Sipas dëshmisë së saj, viktima kishte zbritur nga vetura dhe ishte ndalur për të urinuar, kur papritmas është dëgjuar një krismë arme dhe më pas viktima është ulur në tokë i qëlluar.

Në automjet ndodheshin edhe vëllai dhe motra e viktimës, të cilët kanë reaguar menjëherë duke e vendosur atë në veturë dhe duke e transportuar fillimisht në ambulancën e Klinës, e më pas në spitalin e Pejës me autoambulancë.

Sipas dëshmive, në vendin e ngjarjes nuk është vërejtur ndonjë person i dyshimtë, ndërkohë që autori mbetet i panjohur (NN).

Policia, përfshirë hetuesit dhe forenzikën, kanë dalë në vendin e ngjarjes dhe janë duke kërkuar prova materiale. Për rastin është njoftuar edhe Prokurori kujdestar i Departamentit të Krimeve të Rënda, i cili e ka cilësuar ngjarjen si “Vrasje në tentativë”.

Viktima aktualisht është i shtrirë në spitalin e Pejës dhe po trajtohet nga ekipi mjekësor. Gjendja e tij shëndetësore mbetet nën vëzhgim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.