Ekskluzive: 20 vjeçari godet me grushte të miturin

Një përleshje fizike mes dy të rinjve ka ndodhur pas mesnate në fshatin Leshak, komuna e Leposaviqit, ku një 20-vjeçar ka sulmuar një të mitur, duke i shkaktuar lëndime në fytyrë.

Burime të sigurta të Sinjalit bëjnë me dije se ngjarja ka ndodhur rreth orës 01:30 të mëngjesit të 3 gushtit 2025, në rrugën Brace Matovic, ku është raportuar për një rrahje mes dy personave të nacionalitetit serb.

Në vendin e ngjarjes ka dalë menjëherë patrulla policore, e cila ka takuar viktimën P. J., i cili kishte fytyrën e mbuluar me gjak si pasojë e goditjeve.

Ai është dërguar fillimisht në Qendrën e Mjekësisë Familjare në Leposaviq, e më pas në Spitalin e Mitrovicës Veriore për trajtim të mëtejshëm.

I dyshuari për sulmin, David Todiq, është paraqitur vetë në stacionin policor rreth orës 10:30 dhe është intervistuar nga hetuesit në prani të dëshmitarëve dhe viktimës, e cila gjithashtu ka dhënë deklaratën e saj.

Prokurori i Shtetit, i informuar për rastin, ka urdhëruar që rasti të iniciohet si “Lëndim i lehtë trupor” dhe procedura të vazhdojë në gjendje të lirë për të dyshuarin.

Hetimet rreth motiveve të përleshjes janë ende në zhvillim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.