Gjendet 15 vjeçarja që u raportua e zhdukur

Është gjetur e shëndosh e mirë 15-vjeçarja me shtetësi gjermane, e cila ishte raportuar si e zhdukur mbrëmjen e së dielës në Lipjan, pasi kishte hipur në një veturë me persona të panjohur.

Sinjali raportoi më herët se rasti ishte denoncuar nga X.S., e cila kishte njoftuar Policinë se vajza e saj, E.S. , ishte larguar nga shtëpia pa lejen e saj, në rrugën “Bajram Gashi”, rreth orës 21:30 të datës 03.08.2025.

Pas mobilizimit të njësive policore dhe hetimeve intensive, mësohet se e mitura është kthyer vetë në shtëpi më 04.08.2025, rreth orës 13:00, në gjendje të mirë shëndetësore.

Me urdhër të Prokurores për të Mitur, ajo është intervistuar nga autoritetet, ndërsa rasti do të trajtohet në procedurë të rregullt, për të sqaruar plotësisht rrethanat e largimit dhe identifikimin e personave që mund të kenë qenë të përfshirë.

Policia ka konfirmuar se hetimet janë në zhvillim, ndërsa e mitura ndodhet tashmë në kujdesin e familjes.