“I rash borisë ta hapte rrugën, por më shau – e godita për vdekje me thikë”, detaje nga krimi i rëndë

Gazment Buçpapa, i arrestuar për vrasjen me thikë të Egli Pashollarit, ka dhënë dëshminë e tij para autoriteteve, ku pretendon se ka vepruar në vetëmbrojtje.

Ai deklaroi se viktima e kishte ofenduar në sy të bashkëshortes së tij dhe i kishte bllokuar rrugën me makinën, duke e detyruar të reagojë.

I pyetur për dinamikën e ngjarjes, Buçpapa tha se po dërgonte gruan në punë dhe më pas në spital, por rruga ishte e bllokuar. Ai shtoi se kishte tentuar të hapte rrugën me borinë e makinës, por Pashollari kishte dalë dhe e kishte ofenduar, duke e nxitur të përdorte armën e ftohtë.

Policia njoftoi se 31-vjeçari Pashollari u vra më 20 shkurt në rrugën “Kongresi i Lushnjës” në Tiranë, ndërsa Buçpapa u kap në Tropojë, ku ishte fshehur. Ai akuzohet për “vrasje me dashje” dhe “prodhim, mbajtje, blerje apo shitje pa leje të armëve të ftohta”, ndërsa bashkëshortja e tij kishte deklaruar më parë se Pashollari e ngacmonte atë.