Mitrovicë e Veriut: Policia gjen armë dhe pajisje të dyshimta në një banesë të uzurpuar

Njësitë e Policisë së Kosovës nga Drejtoria Rajonale në Mitrovicën e Veriut kanë zhvilluar një operacion policor me qëllim asistimin e Agjencisë Kosovare për Krahasim dhe Vlerësim të Pronës (AKKVP), ku gjatë veprimeve në terren kanë hasur në pajisje të ndryshme të dyshimta, përfshirë armë dhe municion.

Operacioni është zhvilluar në rrugën “Lola Ribar” në një banesë të uzurpuar dhe të mbyllur, ku nuk banonte askush.

Gjatë kontrollit në këtë lokacion, Policia ka sekuestruar: 56 fishekë të kalibrave të ndryshëm, Municion për pushkë ajrore, Një optik për armë të gjatë, Një kuti për mbushje të municionit, Një fotrollë për pistoletë, Dy gaz-maska, Dy video-kamera dhe një video-kasetë, Dokumente të ndryshme, Një foto-aparat, Një lexues DVD, Një vulë të rrumbullakët.

Hetimet kanë çuar në identifikimin e bashkëshortes së personit që dyshohet se kishte uzurpuar pronën. Ajo është banore në një banesë tjetër afër lokacionit të parë.

Pas kontrollit edhe në këtë banesë, janë sekuestruar: Një pistoletë, Një tytë arme të shkurtë, Një fishek, Një armë e modifikuar në formë stilo-lapsi.

Policia ka arrestuar të dyshuarën M.A., 56 vjeçe. Ajo është intervistuar dhe me urdhër të Prokurorit të Shtetit ndaj saj është iniciuar procedurë për veprën penale “Mbajtje në pronësi, kontroll ose posedim të paautorizuar të armëve”.

Pas intervistimit, ajo është liruar në procedurë të rregullt.