Të shtëna me armë në një dasmë, dy persona përfundojnë në polici

Një rast i armëmbajtjes dhe përdorimit të armës së zjarrit është shënuar mëngjesin e sotëm në komunën e Shtimes, raporton Gazeta Sinjali.

Sipas Policisë Rajonale të Ferizajt, më sot, rreth orës 09:00, stacioni policor në Shtime ka pranuar një informatë se në një dasmë në fshatin Petrovë po kishte të shtëna me armë.

Policia ka arritur të kontaktojë njërin nga të dyshuarit, i cili ka dorëzuar armën e cila është konfiskuar nga autoritetet.

“I dyshuari A.B., 23 vjeç, është intervistuar në prani të avokatit mbrojtës të caktuar sipas detyrës zyrtare. Po ashtu, në vazhdim të hetimeve, është intervistuar edhe personi tjetër i dyshuar A.M., 45 vjeç, për veprën penale ‘Përdorimi i armës apo mjetit të rrezikshëm’”, thuhet në njoftimin e PK-së.

Lidhur me rastin është njoftuar prokurori i shtetit dhe me vendim të tij, të dyshuarit janë liruar në procedurë të rregullt.

Policia apelon tek qytetarët që të shmangin përdorimin e armëve në festa, duke theksuar se “Gëzimet le të festohen me zemër, jo me armë”.