FSK-ja në vështirësi, tenderi për furnizim me bombola dhe gaze medicinale pa asnjë ofertë

Është e disata herë që Ministria e Mbrojtjes ka dështuar të furnizohet me produkte të ndryshme medicinale.

Muaj më parë IndeksOnline pati raportuar se si ky dikaster qeveritar po dështon të furnizohet me oksigjen medicinal, një nevojë thelbësore për mbështetje të kapaciteteve të saj operacionale dhe përballimin e situatave të jashtëzakonshme.

Së fundmi, kjo ministri ka kërkuar që të furnizohet me bombola, azot dhe C02, për nevojat e FSK-së, shkruan IndeksOnline.

Megjithatë, sipas njoftimit të publikuar nga E-Prokurimi, për këtë tender specifik nuk është paraqitur asnjë ofertë nga furnizuesit potencialë.

“Përshkrimi i shkurtër i lëndës së kontratës AK i MM, ka për qellim që të lidhë një kontratë me një OE, qe do të ketë kapacitet të kryej Furnizim me bombola, azot dhe CO2 për nevojat e FSK-së Furnizimet duhet të behet sipas specifikimit teknik te kërkuar të përcaktuar në dosjen e tenderit me qellim të ngritjes se operacionalitetit dhe efikasitetit ne kryerjen e detyrave sipas misionit të FSK MM-së”, thuhet në përshkrimin e lëndës, transmeton IndeksOnline.

Ky furnizim është i nevojshëm për të garantuar funksionimin e plotë të strukturave të sigurisë, duke siguruar që Forcat e Sigurisë së Kosovës (FSK) dhe institucionet shëndetësore të jenë të gatshme të përballen me emergjencat dhe situatat e jashtëzakonshme që mund të lindin në çdo moment.

Vlera e parashikuar për këtë tender ka qenë 15 mijë euro, një shumë kjo që konsiderohet e mjaftueshme për të mbuluar nevojat e furnizimit, por që megjithatë ka dështuar të tërheqë interesin e operatorëve të mundshëm.