Mbyllet protesta kundër Gjykatës Speciales

Sheshet e Prishtinës u mbushën sot me mijëra qytetarë që erdhën nga të gjitha trojet shqiptare për të marrë pjesë në protestën kundër Gjykatës Speciale.

Të organizuar për të kundërshtuar, siç u tha, padrejtësitë ndaj ish-krerëve të UÇK-së, protestuesit dolën në numër të madh në rrugët e kryeqytetit, ndërkohë që qindra të tjerë nuk arritën të vinin për shkak të kolonave të gjata.

Gjatë protestës, para qytetarëve folën figura të njohura të çështjes kombëtare dhe luftës për liri: Hysni Gucati, Arbër Cacaj – djali i dëshmorit Nagip Cacaj, hetuesja ndërkombëtare Nevenka Tromp dhe lideri i BDI-së, Ali Ahmeti.

Gucati: “Kjo është dhunë politike, jo drejtësi”

Kryetari i OVL-UÇK-së, Hysni Gucati, tha para të pranishmëve se kjo gjykatë nuk po sjell drejtësi, por “dhunë politike”.

“Nuk ka gjykatë në botë që mund ta zhbëjë të vërtetën historike. Kjo gjykatë me përzgjedhje selektive, vetëm për krimet e shqiptarëve, po synon ta përmbys historinë e Serbisë. Ajo po tenton të krijojë narrativen e rreme sikur Kosova ishte çliruar nga kriminelët. Ushtria Çlirimtare e Kosovës bashkë me NATO-n e kanë çliruar Kosovën nga kriminelët serbë. Kjo nuk është drejtësi, kjo është dhunë politike. Ky është kriminalizim i UÇK-së”, ka thënë Gucati.

Arbër Cacaj: “Nëse babai im është kriminel, ejani e mi lidhni duart”
Një nga fjalimet më emocionale në protestë e mbajti Arbër Cacaj, djali i dëshmorit Nagip Cacaj. Ai foli për vuajtjet që ka përjetuar familja e tij dhe fëmijët e dëshmorëve.

“Në shtëpinë time e kam një varr të hapur, varrin e babait. Nuk është veç shtëpia ime, ka mbi 1 mijë e 600 varre të hapura. E kam ende pamundësinë për të vendosur një lule në varrin e babait, mbi 1 mijë e 400 fëmijë nuk e patën fatin të rriten të lirë. Nuk arritën ta gëzojnë këtë liri, ata mbetën fëmijë të vrarë e masakruar. Shumë nga ata kriminelë në Hagë po dëshmojnë kundër çlirimtarëve. Nëse babai im është kriminel, edhe unë jam kriminel. Urdhëroni ejani e mi lidhni duart. Kjo nuk është drejtësi, kjo është poshtërsi. Liri për çlirimtarët”, tha ai.

Nevenka Tromp: “Drejtësia e vonuar është drejtësi e mohuar”
Hetuesja e njohur ndërkombëtare, Nevenka Tromp, e cila ka qenë pjesë e hetimeve kundër Slobodan Millosheviqit, tha se kjo gjykatë nuk po funksionon mbi parimin e drejtësisë së barabartë.

“Drejtësia e vonuar është drejtësi e mohuar. Kjo nuk është një parullë por realitet i dhimbshëm që ju përballeni prej vitesh. Që drejtësia të pranohet ajo duhet të ketë legjitimitet. Ne e dijmë që drejtësia mund të jetë subjektive ose objektive, por ajo duhet të udhëhiqet nga organe të pavarura. Gjykatat, ligjet dhe profesionistët duhet të veprojnë në mënyrë të paanshme dhe me profesionalizëm. Nëse drejtësia zbatohet në mënyrë selektive, rrezikon të cilësohet si padrejtësi. Në rastet e tilla ato nuk e zbulojnë të vërtetën por duken të inskenuara. Kjo është veçanërisht e rrezikshme kur institucionet e drejtësisë ndihen të detyruara t’u shërbejnë narrativave politike.”

Ajo kujtoi se liderët e UÇK-së kishin besuar në drejtësi kur pranuan të shkojnë në Hagë vullnetarisht.

“Në vitin 2020 udhëheqësit tuaj shkuan vullnetarisht, duke besuar sikurse ju se drejtësia do të zbatohet shpejt. Ata u siguruan se procesi do të jetë i paanshëm dhe transparent. Megjithatë ja ku jemi, pesë vjet më vonë ata janë ende në paraburgim pa një vendim në horizont. Pikërisht udhëheqësit tuaj mbështetën krijimin e këtyre dhomave. Ata e bënë këtë duke qenë të vetëdijshëm për rrezikun që përbënte për çdo luftëtar të luftës. Pse? Sepse ata besonin në kauzën e tyre. Besonin se lufta për të cilën luftuan, ishte e drejtë”, tha Tromp.

Ali Ahmeti: “Kemi dalur për të kërkuar të drejtën tonë”
Lideri i BDI-së dhe ish-eprori i UÇK-së, Ali Ahmeti, foli për emocionin që e përshkoi gjatë rrugës për në Prishtinë dhe për rëndësinë e bashkimit kombëtar në momentet e vështira.

“Trupi rridht më shkonte rrugës kah vija, djem e vajza, mu si në vitet kur në Kosovë ushtroheshte dhunë dhe i tërë populli organizohej kundër regjimit barbara. Shqiptarët nga të gjitha anët, Struga, Kërçova, Gostivari, Tetova, Shkupi, Kumanova, sot vërshnonin rrugët drejt pjesëmarrjes në këtë protestë për drejtësi. Kombi ynë historikisht ka qenë i bashkuar si një trup i vetëm kur ne na është rrezikuar identiteti dhe dinjiteti. Prandaj, sot si një trup, jemi këtu për të kërkuar liri për lirimtarët që po trajtohen padrejtësisht nga Gjykata Speciale. Kemi dalur për të kërkuar të drejtën tonë. UÇK-ja ka bërë luftë të drejtë, luftë për liri, luftë për çlirim nga pushtimi. Që nga viti 1994 kur filloi të komunikohej veprimet e saj, ajo ka qenë e qartë për qëllimin e saj çlirimtar. Ushtria Çlirimtare e Kosovës i është përmbajtur ligjeve ndërkombëtare të luftës përfshirë konventën e Gjenevës, të vitit 1949”, tha Ahmeti.

Ai shtoi se ndalimi i ish-krerëve të UÇK-së përbën një rrezik për stabilitetin në rajon.

“Në rajonin tonë, në disa lider të ri më së shumti mungon bashkëpunimi, stabiliteti e qartësia pro-perëndimore. Kush i mban të mbyllur këta kontribuues stabiliteti, punon kundër stabilitetit tonë, dhe vet Perëndimit në Ballkan. Gjatë luftërave, pas tyre, e deri më sot, asnjëherë Serbia e zyrtarët e Maqedonisë nuk janë pajtuar me të drejtat e shqiptarëve. Serbia po bën gjithçka për zhbërjen e pavarësisë së Kosovës përmes Gjykatës Speciale të Hagës. Po përpiqet të përmbys çdo të arritur në Kosovë. Gjykata u formua si u formua, u votua si u votua nga deputetë, u bë si u bë, ishte si ishte, por edhe ashtu siç u krijua, ajo nuk po e respekton të drejtën për një gjykim të paanshëm, të drejtë e brenda afatit të aryeshëm”, u shpreh Ahmeti.

“Ajo punon sikur Serbia, duke pranuar prova nga ata që kanë kryer krime”, deklaroi ai.

Protesta përfundon pa incidente

Pas përfundimit të fjalimeve, protesta u mbyll e qetë dhe protestuesit u shpërndanë pa ndonjë incident. Organizatorët dhe qytetarët u larguan nga sheshet e Prishtinës duke lënë pas një mesazh të qartë: “Drejtësi për çlirimtarët”.