Drita humb me përmbysje në Rumani

Skuadra nga Gjilani, Drita, ka pësuar humbje në ndeshjen e parë të raundit kualifikues të Conference League kundër FCSB (Steaua Bukureshtit), pas një takimi tejet dramatik të zhvilluar në Rumani.

Djelmoshat e trajnerit Nuhiu e nisën mbarë ndeshjen, duke kaluar në epërsi që në minutën e 7-të me një finalizim të saktë të Veton Tushës, i cili mposhti portierin vendas me qetësi.

Në pjesën e dytë, Drita vazhdoi me lojë të sigurt dhe dyfishoi avantazhin në minutën e 50-të, kur Arb Manaj shënoi pas një aksioni të bukur, duke ngritur shifrat në 0-2.

Megjithatë, vendasit reaguan shpejt. Daniel Bîrligea ngushtoi rezultatin në minutën e 64-të, duke rikthyer FCSB-në në lojë. Vetëm pak minuta më pas, në të 72-tën, Daniel Graovac barazoi me një goditje të fuqishme me kokë pas një harkimi nga këndi.

Drita u përpoq të ruante barazimin, por në minutën e 90+3, arbitri akordoi një penallti për vendasit. Bîrligea u tregua i saktë nga pika e bardhë, duke vulosur rezultatin përfundimtar 3-2 në favor të FCSB-së.