Mustafa: Gjykata ka konstatuar se Dehari, nën direktivat e VV-së ka vepruar në kundërshtim me Kushtetutën

Deputeti i LDK-së, Besian Mustafa, ka reaguar pas vendimit të sotëm të Gjykatës Kushtetuese, duke e cilësuar atë si një hap kyç për mbrojtjen e rendit kushtetues dhe të së ardhmes institucionale të vendit.

Në një konferencë për media, Mustafa ka akuzuar Lëvizjen Vetëvendosje (LVV) për veprime të qëllimshme dhe të koordinuara në kundërshtim me Kushtetutën dhe me një vendim të mëparshëm të gjykatës.

“Gjykata Kushtetuese ka konstatuar se z. Dehari, nën direktivat e partisë, ka vepruar në kundërshtim me Kushtetutën, duke cenuar rendin kushtetues.”, tha Mustafa.

Ai e vlerësoi këtë si një përpjekje të organizuar për të vënë nën kontroll institucionin më të lartë të vendit.

“Sot jemi në një moment vendimtar për të ardhmen institucionale të vendit tonë, njoftimi i sotëm i Gjykatës Kushtetuese është i qartë, i prerë dhe pa ekuivok. LVV nuk e ka respektuar Kushtetutën, në kundërshtim me aktgjykimin e Gjykatës Kushtetuese të datës 26 qershor. Përmes veprimeve të koordinuara dhe të qëllimshme, VV-ja ka vazhduar të marrë veprime që sot janë shpallur të pavlefshme dhe antikushtetuese nga autoriteti më i lartë.”, u shpreh Mustafa.

Ai theksoi se vendimi i gjykatës duhet të merret seriozisht nga të gjitha institucionet dhe faktorët politikë në vend, pasi tregon qartë një përpjekje të rrezikshme për kapjen e shtetit.

“Gjykata Kushtetuese ka konstatuar që zoti Dehari, si kryesues i seancës, nën direktivat e partisë ka vepruar në kundërshtim me Kushtetutën, duke injoruar vendimet e gjykatës dhe duke cenuar rendin kushtetues. Kjo është një përpjekje e qëllimshme për të kapur institucionin më të lartë, duke bërë shkelje të qëllimshme.”, ka thënë Mustafa.