Memli Krasniqi i bindur që Podujeva do të ndryshojë me PDK-në në qeverisje

Partia Demokratike e Kosovës ka prezantuar zyrtarisht kandidatin për kryetar të Komunës së Podujevës.

Isak Shabani nga kjo parti do të jetë në krye të PDK-së për zgjedhjet lokale në Podujevë.

I pari i PDK-së, Memli Krasniqi është shprehur i bindur në fitore.

Më poshtë postimi i Krasniqit:

Isaku për Podujevën!

Kjo është oferta jonë – dhe kjo është ajo që i duhet Podujevës.
Podujeva ka nevojë për një udhëheqje që e njeh qytetin në çdo cep, i njeh njerëzit dhe hallet e tyre. Një udhëheqje që di të bashkojë, të planifikojë dhe të punojë me vizion afatgjatë.

Isak Shabani është njeriu që i plotëson këto nevoja. Me përvojë si ish-deputet, tre mandate asamblist dhe zyrtar i lartë në administratën shtetërore, ai ka njohuri të thella për funksionimin e institucioneve dhe menaxhimin e komunës.

Me përkushtim të dëshmuar atdhetar, si bashkëluftëtar i komandantit Zahir Pajaziti, ai e di çfarë do të thotë të shërbesh për interesin e përbashkët – për një thirrje më të madhe se vetja.

Jam i bindur se me Isakun në krye, Podujeva do të ketë udhëheqjen e përgjegjshme, të ndershme dhe të përkushtuar që e meriton.