Vdes astronauti legjendar i NASA-s

James Lovell, një nga figurat më ikonike të programit hapësinor amerikan dhe pjesë e misioneve më të rëndësishme të NASA-s, ka ndërruar jetë në moshën 97-vjeçare.

Lovell do të mbahet mend për gjithmonë për frazën historike “Houston, kemi një problem”, të cilën e transmetoi gjatë misionit dramatik Apollo 13 në vitin 1970, kur një shpërthim i një tanku oksigjeni vuri në rrezik jetën e tij dhe të anëtarëve të tjerë të ekuipazhit.

Ata mbetën të bllokuar pranë Hënës me rezerva minimale oksigjeni dhe uji, në një nga situatat më të rënda të eksplorimit hapësinor.

Përpara kësaj ngjarjeje dramatike, në vitin 1968, Lovell ishte pjesë e misionit historik Apollo 8, së bashku me astronautët Frank Borman dhe William Anders.

Ata u bënë njerëzit e parë që udhëtuan përtej orbitës së Tokës dhe orbituan Hënën – një moment historik në garën hapësinore.

Jeta dhe karriera e James Lovellit shënojnë një epokë të artë të eksplorimit hapësinor. Ai mbetet një simbol i guximit, përkushtimit dhe shpirtit eksplorues që frymëzoi breza të tërë.