LVV zyrtarizon kandidatët për kryetarë të Zveçanit, Zubin Potokut dhe Leposaviqit

Kryeministri në detyrë i Kosovës njëherit kryetari i Lëvizjes Vetëvendosje ka zyrtarizuar kandidatët për kryetar në Komunën e Zveçanit, atë të Zubin Potokut dhe Leposaviqit.

Kandidat për kryetar të Leposaviqit nga LVV do të jetë përsëri Lulzim Hetemi, i cili është edhe kryetari aktual, në Zubin Potok do të kandidojë Vedat Mehmeti e në Zveçan kandidati Fetah Peci.

Sipas njoftimit të partisë, Hetemi ka ecur çdo ditë në terren, mes njerëzve, duke dëshmuar se guximi nuk është vetëm fjalë, por veprim.

“Me integritetin dhe vendosmërinë e tij, ai ka treguar se Leposaviqi mund të udhëhiqet me dinjitet dhe me besnikëri ndaj ligjit e qytetarëve”- thuhet në njoftim.

Ndërsa për kryesuesin e kuvendit komunal, Vedat Mehmeti, i cili do të kandidojë për kryetar në Komunën e Zubin Potokut, LVV thonë se bart vizionin për ta kthyer komunën në një hapësirë ku drejtësia dhe bashkëpunimi me qeverinë janë mjete për zhvillim të përbashkët, jo slogane.

Për Vetëvendosjen, kandidati për Zveçan, Fetah Peci, është zëri i qartë i bashkimit dhe zhvillimit, që e njeh mirë Zveçanin.

“Ai vjen me përvojën e një njeriu që nuk rri mënjanë, por punon për ta thyer izolimin dhe për t’i hapur rrugë mundësive të reja për secilin banor”- thuhet tutje në komunikatë.

Zgjedhja e kandidatëve të lartcekur, sipas partisë tregon se garancia në veri do të vazhdojë të ndërtojë institucione funksionale, të sjellin investime që prekin jetën e përditshme të qytetarëve dhe të garantojmë qeverisje që respekton ligjin dhe punon për të gjithë.

“Më 12 tetor [2025], e ardhmja e veriut do të shkruhet me punë, me vizion dhe me fitoren e Lëvizjes VETËVENDOSJE! Bashkë përpara – për komunat tona, për qytetarët tanë, për të ardhmen tonë!”- përfundojnë nga subjekti politik, Vetëvendosje.