Arrestohet 23 vjeçari shqiptar në Zvicër
Një i ri shqiptar 23-vjeçar, i cili kishte hyrë në Zvicër si turist, është arrestuar nga autoritetet zvicerane nën akuzën për trafikim të kokainës.
Sipas Policisë dhe Zyrës së Prokurorit Publik, i riu dyshohet se ishte pjesë e një rrjeti shpërndarësish droge në qytetin e Bellinzonës.
Gjatë një kontrolli në banesën ku ai qëndronte, u sekuestruan dhjetëra doza kokaine të gatshme për shitje, rreth 1 mijë franga zvicerane dhe qindra euro në para të gatshme, të cilat dyshohet se janë fituar nga aktivitetet kriminale.
Arrestimi u bë të hënën, pas marrjes së informacioneve operative nga policia. I riu po ashtu akuzohet për pastrim parash dhe për shkelje të ligjit federal për të huajt, raporton Euronews.al.
Gjyqtari për masat shtrënguese e ka konfirmuar arrestimin, ndërsa hetimet për rrjetin kriminal vazhdojnë.
