Kapet një burrë duke fotografuar femrat në plazh

Një qytetare ka denoncuar një ngjarje shqetësuese që ka ndodhur pasditen e sotme në një plazh buzë liqenit të Ohrit në Pogradec.

Sipas saj, një burrë i moshuar është pikasur duke fotografuar dhe filmuar gratë e vajzat që pushonin, duke përdorur zmadhimin për t’u fokusuar në zonat intime të trupit të tyre.

Në videon e siguruar nga denoncuesja, ajo i afrohet dhe i kërkon llogari personit të identifikuar prej saj si Gjergj Dodaj, ndërsa ky mohon veprimet. Siç shihet dhe në video, qytetarja ia ka marrë telefonin nga duart dhe ka gjetur foto e video që, sipas saj, ai ia dërgonte miqve jashtë vendit, duke komunikuar me ta në frëngjisht.

Sipas saj, personi në fjalë është një shtetas shqiptar me banim në Belgjikë. Rasti është denoncuar në polici, ndërsa i moshuari është shoqëruar në komisariat për veprime të mëtejshme hetimore. Denoncuesja pretendon se në celularin e tij janë gjetur edhe shumë materiale të tjera të ngjashme, ndërsa thotë se ai ka tentuar t’i fshinte ato.

Policia, sipas saj, ka ndërhyrë menjëherë, duke mbërritur në vendngjarje vetëm pak minuta pas sinjalizimit dhe ka sekuestruar telefonin e të dyshuarit.

Denoncimi i plotë:

Përshëndetje JOQ! Një situatë shumë shqetësuese na ka ndodhur sot në Pogradec, në plazh. Ishte një burrë i moshuar dhe ai u bënte video të tëra grave/vajzave në plazh, ishin ulur në ujë në shezllone (duke zmadhuar videon në pjesë intime) dhe i çonte këto foto në WhatsApp te miqtë e tij, me emoji erotike ( etj). Unë i kërkova t’i fshinte këto video dhe foto, por ai e mohonte. Ia mora telefonin me zor (siç duket edhe në video, pasi nuk donte ta jepte telefonin). Shpërndajeni se është një monstër (në këto momente jam në komisariatin e Pogradecit). Ju lutem shpërndajeni këtë video, sepse është shumë shumë shqetësuese, e meriton. Dhe aty ishin shumë e shumë video të tjera, sepse kush e di çfarë bën dhe çfarë mund t’u bëjë edhe fëmijëve ky kafshë! Sepse jetonte edhe në Belgjikë, ndyrësira! Gjergj Dodaj quhet personi! Policia na u gjend direkt pranë, madje që kur ndodhi debati, për 3 minuta ata erdhën aty. Ia morën telefonin dhe ia hapën, derisa u treguam provat, pasi ky donte t’i fshinte.