Foto me politikanë, i arrestuar për fajde: Historia e Mefail Shkodrës që po kërkohet për vrasjen e trefishtë në Gjilan

Gjilani u trondit rëndë sot nga një krim i trefishtë. Tre persona kanë mbetur të vrarë dhe një tjetër është plagosur pas të shtënave me armë zjarri që ndodhën rreth orës 12:32 në rrugën “Ibrahim Rugova”.

Sipas Policisë së Kosovës, i dyshuari kryesor për këtë ngjarje të rëndë është Mefail Shkodra, një emër i njohur për organet e rendit dhe publikun.

Konflikti dyshohet të ketë ardhur për shkak të fajdes, një veprimtari e paligjshme për të cilën Shkodra ishte arrestuar edhe vitin e kaluar, raporton Paparaci.

Zëdhënësi i policisë për rajonin e Gjilanit, Ismet Hashani, konfirmoi se i dyshuari ndodhet në arrati dhe se njësitet relevante policore po punojnë intensivisht për kapjen e tij.

“I dyshuari për rastin është personi mashkull shtetas i Kosovës, i njohur për policinë i cili për momentin është në arrati. Në vendin e ngjarjes kanë dalë njësitet relevante dhe prokurori i shtetit. Policia e Kosovës, njësiti i hetimeve rajonale në bashkëpunim me prokurorin e shtetit po i hetojnë rrethanat e këtij rasti të rëndë”, tha Hashani.

Me autorizim të Prokurorisë Themelore në Gjilan, Policia ka shpallur në kërkim Mefail Shkodrën dhe ka publikuar fotografinë e tij, duke u bërë thirrje qytetarëve dhe mediave për bashkëpunim.

“Policia e Kosovës, Drejtoria Rajonale e Policisë në Gjilan, bazuar në autorizimin e Prokurorisë Themelore në Gjilan, me qëllim të lokalizimin dhe arrestimin e të dyshuarit, lëshon këtë kërkesë për bashkëpunim me qytetarë dhe mediat”, thuhet në njoftim. “Policia e Kosovës, Drejtoria Rajonale Gjilan kërkon nga qytetarët dhe mediat që kushdo që ka informacion për vendndodhjen e personit në foton e bashkangjitura, të lajmërojë Policinë e Kosovës në stacionin më të afërt policor apo përmes aplikacionit digjital “Lajmëro Policinë’’, E-mail: [email protected] dhe numrat kujdestarë:192; 03850807001. Të dhënat e juaja do të ruhen në konfidencialitet të plotë”, thuhet në njoftimin zyrtar.

Ngjarja e sotme nuk është përplasja e parë e Shkodrës me ligjin.

Më 2024, ai ishte arrestuar gjatë një aksioni të gjerë të Policisë së Kosovës në tri rajone të vendit, për veprat penale “Fajde” dhe “Detyrim”.

Në atë rast, në Gjilan, policia arrestoi Shkodrën dhe një tjetër person, ndërsa një i tretë u shpall në kërkim.

Sipas Prokurorisë së Gjilanit, dëmi i shkaktuar nga të dyshuarit tek viktima arrinte mbi 600 mijë euro.

Shkodra u bë i njohur edhe përmes rrjeteve sociale, ku publikonte fotografi me vetura luksoze dhe pozonte pranë figurave politike të larta, përfshirë kryeministrin Albin Kurti, presidenten Vjosa Osmani dhe kryetarin e Prishtinës, Përparim Rama.

Vetëm një vit pasi u vu në pranga për fajde, Shkodra është sot në qendër të një kërkimi intensiv, i dyshuar për një nga rastet më të rënda kriminale që ka parë Gjilani vitet e fundit.

Një ngjarje që ka lënë pas tre viktima, një të plagosur dhe një qytet të tërë në tronditje, ndërsa policia po zhvillon një operacion të gjerë për kapjen e tij.

Zëdhënësi i Policisë për rajonin e Gjilanit, Ismet Hashani tha më herët se “në vendin e ngjarjes kanë dalë njësitet relevante dhe prokurori i shtetit” dhe se “Policia e Kosovës, njësiti i hetimeve rajonale në bashkëpunim me prokurorin e shtetit po i hetojnë rrethanat e këtij rasti të rëndë”.