LAJMI I FUNDIT: Kosova nuk gjen qetësi, tjetër plagosje

Një përleshje mes disa personave është raportuar sot rreth orës 09:00 në fshatin Polac të Skenderajt, ku si pasojë një person ka mbetur i plagosur.

Sipas Policisë, nga informacionet fillestare dyshohet se i plagosuri është vetëplagosur aksidentalisht, pasi kishte shtënë me armë zjarri në tokë dhe një plumb që kishte bërë rikoshet e kishte goditur në këmbë.

Personi i lënduar është dërguar në emergjencën e Qendrës Kryesore të Mjekësisë Familjare (QKMF) në Skenderaj për trajtim mjekësor dhe ndodhet jashtë rrezikut për jetë.

Në vendin e ngjarjes, Policia ka konfiskuar një armë zjarri dhe dy gëzhoja. Po ashtu, katër persona të dyshuar janë shoqëruar në stacionin policor për intervistim dhe procedura të mëtejshme.

Njësitë relevante policore janë të përfshira në hetimin e rastit dhe po vazhdojnë me veprimet e nevojshme për sqarimin e plotë të rrethanave.