Përleshje në një lokal – Përdoret arma, ka të lënduar

Të dielën, më 10.08.2025, Policia ka arrestuar një burrë në fshatin Polac të Skenderajt pas një përleshjeje të raportuar në një lokal rreth orës 09:00 të mëngjesit të sotëm, ku dyshohet se është përdorur armë zjarri.

Sipas Policisë së Kosovës, në rast kanë ndërhyrë njësitë e Trafikut Rajonal, të cilat kanë ndërprerë përleshjen mes palëve.

Gjatë incidentit një person ishte lënduar.

“Personi i lënduar është dërguar në emergjencën e QKMF në Skenderaj për tretman mjekësor e më pas edhe në Spitalin Rajonal në Mitrovicë dhe sipas mjekut lëndimet janë të natyrës së lehtë. Pas tretmanit mjekësor, personi është  intervistuar pasi që kishte qenë edhe i dyshuari në këtë rast”- thuhet në njoftim.

Tutje, në njoftim bëhet e ditur se një armë e llojit pistoletë dhe një karikator me gjashtë fishekë janë konfiskuar në vendin e ngjarjes, të cilat  i përkisnin personit të dyshuar.

“Gjithashtu në vendin e ngjarjes janë gjetur dhe konfiskuar edhe dy gëzhoja dhe një predhë”- njofton më tej Policia.

Lidhur me rastin janë intervistuar dëshmitarët.

“Është kontaktuar prokurori kujdestar i cili ka urdhëruar që ndaj të dyshuarit I.L., 48 vjeçar, shtetas i Republikes së Kosovës, të inicohet rasti për veprat penale: ,,Armëmbajtje pa leje” dhe ,,Përdorim i armës apo mjetit të rrezikshëm”, e poashtu me vendim të prokurorit atij i është caktuar masa e ndalimit policor prej 48 orësh”- bënë të ditur policia.