Dyshohet për 2 viktima, flakët përfshijnë fshatra të tërë
Zjarret masive që kanë përfshirë prej ditësh disa zona të vendit, vijojnë të përshkallëzohen duke lënë pas dëme të mëdha materiale dhe, tragjikisht, humbje jetësh.
Një tjetër viktimë dyshohet të jetë regjistruar në qarkun e Elbasanit si pasojë e asfiksisë nga tymi. Kjo vjen vetëm një ditë pasi një 80-vjeçar humbi jetën në fshatin Kullollas, pasi ndezi zjarr në oborrin e banesës, i cili doli jashtë kontrollit dhe u përhap me shpejtësi në të gjithë zonën.
Sipas raportimeve, dhjetëra banesa janë shkrumbuar plotësisht në fshatrat Kullollas, Bletëz, Skënderbegas, Menkollarë, Zenelas dhe Harunas. Një fshat i shtatë është përfshirë së fundmi nga flakët, ndërsa një tjetër ndodhet në rrezik të menjëhershëm.
Situata në Gramsh mbetet kritike pasi era e fortë po ndihmon përhapjen e zjarreve dhe ka nxitur krijimin e vatrave të reja në zona të tjera, përfshirë edhe njësinë administrative Kodovjat, ku flakët i janë afruar fshatit Posnovisht.
Deri në mbrëmjen e djeshme janë raportuar 34 vatra aktive zjarri në të gjithë vendin, prej të cilave 27 mbeten aktive dhe 7 nën monitorim. Më problematike paraqitet situata në jugin e vendit, ku zjarret kërcënojnë jo vetëm banesat, por edhe zonat e mbrojtura dhe infrastrukturën.
