Ekskluzive: Hajnat futen në shtëpinë e familjes Jakupi

Një vjedhje e rëndë ka ndodhur mbrëmjen e së premtes në fshatin Koshare të Ferizajt, ku hajnat kanë depërtuar në një shtëpi private dhe kanë marrë një shumë të madhe parash dhe stoli ari.

Sipas burimeve të Sinjalit, viktima Ilmi Jakupi ka raportuar se rreth orës 19:30 kishte dalë me familjen në qytet dhe, kur ishte kthyer në orën 23:00, ka gjetur shtëpinë e tij të demoluar dhe të grabitur.

Persona të panjohur kishin hyrë me forcë nga dritarja e pasme dhe kishin marrë rreth 5,000 euro para të gatshme dhe stoli ari me vlerë rreth 15,000 euro.

Në vendin e ngjarjes kanë dalë njësitë policore dhe forenzika rajonale, të cilat kanë kryer ekzaminimin, por në perimetrin përreth nuk janë gjetur kamera sigurie që do të ndihmonin hetimin.

Me urdhër të prokurorit kujdestar për Krime të Rënda, rasti është iniciuar si “Vjedhje e rëndë”, ndërsa policia po zhvillon hetime për identifikimin dhe kapjen e autorëve.