Katër të rinj vdesin në aksident tragjik në Gjermani

Një aksident i rëndë trafiku ka ndodhur në qytetin Kürten të Gjermanisë, ku katër adoleshentë kanë humbur jetën, ndërsa një tjetër është plagosur rëndë.

Sipas mediave gjermane, pesë të rinjtë po udhëtonin me një automjet kur humbën kontrollin dhe makina doli nga rruga, duke përfunduar jashtë saj. Viktimat ishin të moshës 16 deri në 19 vjeç. Katër prej tyre nuk arritën t’i mbijetonin plagëve të marra, ndërsa shoferi 16-vjeçar u nxor nga makina me lëndime të rënda dhe u dërgua me urgjencë në spital.

Autoritetet gjermane po hetojnë shkaqet e aksidentit, ndërsa nuk dihet ende me saktësi se çfarë ka çuar në humbjen e kontrollit të automjetit.

Policia dhe ekipet emergjente u angazhuan menjëherë në vendngjarje, por për katër të rinjtë nuk pati më asnjë mundësi shpëtimi.