Tragjedi e madhe – Shpërthimi i fuqishëm në fabrikë lë të vdekur 11 persona dhe mbi 100 të plagosur

Një ngjarje tragjike ka ndodhur të premten mbrëma në rajonin e Riazanit në Rusi, ku një shpërthim i fuqishëm në një fabrikë ka marrë jetën e të paktën 11 personave dhe ka lënë të lënduar 130 të tjerë, raporton Ministria ruse e Emergjencave.

Ekipet e shpëtimit vazhduan edhe të shtunën kërkimet mes rrënojave të fabrikës, me shpresën për të gjetur të mbijetuar apo trupat e viktimave të tjera.

Sipas guvernatorit të Riazanit, Pavel Malkov, gjithçka filloi nga një zjarr që shpërtheu brenda një punëtorie të fabrikës, por deri më tani nuk dihen shkaqet e sakta të zjarrit. Autoritetet nuk kanë dhënë as informacione se çfarë prodhonte fabrika.

Megjithatë, burime nga emergjenca i kanë thënë agjencisë RIA Novosti se shkeljet e rregullave të sigurisë mund të jenë shkaku i tragjedisë. Disa media ruse kanë spekuluar se në objekt mund të ketë pasur barut, dhe se ai mund të ketë qenë burimi i shpërthimit.

Për nder të viktimave, autoritetet vendore kanë shpallur një ditë zie në gjithë rajonin.