“Guxo” s’mund të ketë dy kryetarë, KQZ po shqyrton zgjedhjet e brendshme të kësaj partie

Më 7 shtator të këtij viti “Guxo” mbajti Kuvendin e brendshëm zgjedhor, i cili nxori Faton Pecin dhe Donika Gërvallën si kryetarë të përbashkët të kësaj partie.

Megjithatë, kjo legjislaturë e brendshme e partisë duket të jetë e parregullt konform rregullave për regjistrimin dhe çertifikimin e partive, ashtu siç edhe e parasheh Komisioni Qendror i Zgjedhjeve.

KQZ vazhdimisht monitoron këtë pjesë, e që në rastin e “Guxo” edhe kanë pasur gjetje.

Së pari, në bazë të Rregullorës 01/2013, një parti politike duhet të ketë vetëm një kryetar. Asi soji edhe i referohet, në numrin njëjës.

Lidhur me gjetjet mbi këtë process zgjedhor të brendshëm, është deklaruar edhe zëdhënësi i KQZ-së, Valmir Elezi.

“Zyra për Regjistrim të Partive Politike dhe Certifikim, ka monitoruar nga afër kuvendin e parë zgjedhor të partisë politike Guxo. Kjo Zyrë ka renditur disa gjetje në raport me Ligjin për Zgjedhjet e Përgjithshme dhe Rregullën Zgjedhore 01/2013 për regjistrimin dhe veprimin e partive politike” pohoi Elezi për Indeksonline.

I njëjti tha se këto rekomandime do të shqyrtohen në mbledhjet e ardhshme, për të marrë pastaj një vendim.

“Rekomandimi i Zyrës do të shqyrtohet në njërën nga mbledhjet e radhës dhe KQZ-ja do të marrë vendimin meritor.”

“Guxo” ka të drejtë ankese ndaj çfarëdo vendimi të KQZ-së, duke e paraqitur atë në PZAP, jo më larg se 24 orë pas marrjes së përgjigjes nga KQZ.