LAJMI I FUNDIT: Ndërpriten punimet në rrugën Podujevë

Sekretari i Përgjithshëm i Ministrisë së Kulturës, Rinisë dhe Sportit, Bislim Bislimi në një konferencë për media ka deklaruar se Inspektorati ka marrë vendim që të ndërpres çdo veprim në ndërtimin e rrugës Prishtinë – Podujevë.

Kjo sipas tij, pasi shqyrtimin dhe vlerësimin për këtë vendim e kanë bërë Instituti Arkeologjik dhe Inspektorati i Trashëgimisë Kulturore.

Ndërtimin e kësaj rruge po e kryen Ministria e Mjedisit, Planifikimit Hapësinor dhe Infrastrukturës.

Mund të prekë hapësirën dhe asetet e trashëgimisë kulturore, lokaliteti arkeologjik Kalaja në Kulinë në fshatin Tenezhdoll në Komunën e Prishtinës” – ka deklaruar Bislimi para mediave.

Gjatë mandatit 4-vjeçar të Qeverisë Kurti 2 janë dhënë katër afate të ndryshme për përfundimin e rrugës Prishtinë – Podujevë. Fillimisht është përmendur viti 2021, më pas fundi i vitit 2022. Zotimi tjetër ishte për fundin e vitit 2024, ndërsa në përfundim të mandatit qeverisës zotimi është dhënë për pranverën e vitit 2025.

Disa muaj pas fillimit të mandatit të Qeverisë Kurti 2, në muajin gusht 2021, ministri i Mjedisit, Planifikimit Hapësinor dhe Infrastrukturës, Liburn Aliu kishte premtuar se punimet në rrugën Prishtinë – Podujevë do të përfundojnë në vitin 2021.

“Rruga Prishtinë – Podujevë do të përfundojë këtë vit.” – ka thënë ministri Aliu në emisionin “KallxoPërnime”, më 11.08.2021.

Rreth tre muaj më vonë shefi i Ekzekutivit Albin Kurti nuk e kishte dhënë afatin e njëjtë si anëtari i Kabinetit të tij qeverisës, Liburn Aliu.

Në

nëntor 2021, Albin Kurti derisa kishte shkuar në Podujevë për të vizituar punimet, bashkë me të parin e Podujevës, Shpejtim Bulliqin, kishte premtuar që projekti do të përfundojë në vitin 2022.

“Jemi bashkë me Bulliqin që ta konstatojmë një zvarritje dhe zhagitje e cila përveç që e dëmshme është edhe e paarsyeshme. Prandaj, teksa sektori dy do të përfundojë deri në fund të vitit 2021, në vitin 2022 ne zotohemi që do t’i përmbyllim komplet punimet dhe gjithçka çka është e nevojshme, në mënyrë që kjo rrugë e cila lidh Llapin me Kryeqytetin të jetë e përfunduar dhe asisoj njerëzit të mos i kenë këto vështirësi me këtë trafik kaq të dendur, i cili duket si në qendër të Prishtinës e jo këtu ku ndodhemi ne.” – kishte deklaruar Kurti, më 02.11.2021.

Ky projekt nuk ka përfunduar në vitin 2022, siç ishte zotuar kryeministri Kurti. Zotimi i radhës për përfundimin e këtij projekti ishte dhënë nga zv.ministri i Infrastrukturës, Hysen Durmishi, i cili në qershor të vitit 2024 kishte premtuar se rruga Prishtinë – Podujevë do të finalizohet në fund të vitit 2024.

Gjatë këtij viti përfundon.” – ishte përgjigjur Durmishi kur ishte pyetur më 24.06.2024, nga KALLXO.com, në lidhje me këtë projekt.

Pasi kanë kaluar disa muaj nga premtimi i dhënë nga zv.ministri Durmishi, në muajin tetor 2024 KALLXO.com ka kërkuar përsëri përgjigje nga Ministria e Mjedisit, Planifikimit Hapësinor dhe Infrastrukturës se kur do të përfundojë ndërtimi i rrugës Prishtinë – Podujevë.

Afati për finalizimin e këtij projekti ndryshoi nga ajo që e kishte premtuar Durmishi në muajin qershor. Durmishi kishte deklaruar se projekti përmbyllet në fund të vitit 2024, ndërsa më 30.10.2024 në përgjigjen e Ministrisë së Infrastrukturës thuhej se përfundimi i kësaj rruge pritet të bëhet në muajin prill 2025

“Në seksionin e rrugës punimet pritet të përfundojnë brenda afatit kohor, kurse sa i përket strukturave, ato nuk mund të përfundojnë brenda afatit. Përfundimi i realizimit të projektit pritet të përfundojë në muajin prill 2025, varësisht nga kushtet atmosferike dhe angazhimi i operatorëve ekonomikë.” – thuhet në përgjigjen e Ministrisë së Infrastrukturës për KALLXO.com, më 30.10.2024.

Pranverën e vitit 2025 si afat për përfundimin e rrugës Podujevë – Prishtinë e ka përmendur edhe kryeministri Albin Kurti, gjatë tubimit elektoral që e ka mbajtur para qytetarëve të Podujevës, më 15.01.2025.

“Rruga Podujevë – Prishtinë përfundon në pranverën 2025. Kësaj pritjeje të gjatë po i vjen fundi, sepse Qeveria jonë e mirë ka punuar edhe me problemet në mangësitë në shpronësime, edhe me projektimet e këqija. Rruga kryhet përgjithmonë në pranverën e sivjetshme.” – u shpreh Kurti, më 15.01.2025 (min 53:15)

Për herë të parë projekti për zgjerimin e rrugës Prishtinë – Podujevë kishte filluar në vitin 2016, kur ministër i Infrastrukturës ka qenë Lufti Zharku, nën qeverisjen e ish-kryeministrit Isa Mustafa. Punimet në këtë rrugë kishin vazhduar edhe gjatë mandatit të ministrit Pal Lekaj, kur në krye të Qeverisë së Kosovës ishte Ramush Haradinaj.

Gjatë Qeverisë Kurti, tenderi për zgjerimin e rrugës Prishtinë – Podujevë është hapur më 06.01.2023. Ky tender ishte ndarë në 5 LOT-e dhe vlera totale e Kontratave ishte rreth 35 milionë euro. Pesë Kontratat për pesë LOT-et e këtij tenderi janë nënshkruar më 19 dhe 20.06.2023.

Në korrik të vitit 2023, në emisionin “Kallxo Përnime”, ishte publikuar hulumtimi pikërisht për rrugën Prishtinë – Podujevë, në të cilin tregohej se si Hysen Durmishi kishte nënshkruar Kontratat për këtë tender – duke pasur ankesë aktive në Organin Shqyrtues të Prokurimit (OSHP).