Pacienti humb jetën pas mbushjes së dhëmbit, dentisti shqiptar merret në pyetje

Të tjera detaje janë zbuluar për ngjarjen e rëndë të ndodhur pasditen e djeshme në qytetin e Bilishtit, ku një 59-vjeçar me inicialet Sh. D., me banim në fshatin Progër, humbi jetën tragjikisht pas ndërhyrjes në një klinikë dentare në qytet.

Familjarët e të ndjerit kanë folur jashtë kamerave, duke shfajësuar dentistin me inicialet B. L., 36-vjeç. Sipas familjarëve vdekja nuk ka lidhje me mbushjen e dhëmballës që bëri i afërmi i tyre, por me shkaqe natyrale. Sipas dyshimeve paraprake, gjithçka ndodhi për shkak të një infarkti.

59-vjeçari raportohet se është ankuar disa herë gjatë mbushjes së dhëmballës duke thënë se “nuk jam mirë”. Sipas policisë, ai humbi jetën rreth një orë pasi mori mjekim nga dentisti.

Dentisti 36-vjeçar u shoqërua mbrëmjen e djeshme për t’u marrë në pyetje për ngjarjen, dhe tashmë është proceduar penalisht në gjendje të lirë për veprën penale “neglizhenca në trajtimin mjekësor”.

Grupi hetimor ka marrë kartelën mjekësore të qytetarit që ndërroi jetë, dhe do të jenë hetimet e mëtejshme që do të hedhin dritë për këtë ngjarje të rëndë.