Dy 19-vjeçarë kapen duke bërë gara shpejtësie, njërit i konfiskohet vetura

Policia e Ferizajt ka ndaluar dy shoferë të rinj, rreth 19-vjeçarë, të cilët po zhvillonin gara shpejtësie në rrugën “Driton Islami”, duke rrezikuar sigurinë e pjesëmarrësve në trafik dhe të qytetarëve.

Sipas policisë, shoferi L.Q. u gjobit me 1000 euro, ndërsa ndaj Y.T. u shqiptua gjobë prej 500 eurosh, ndalim drejtimi për 12 muaj, një gjobë shtesë prej 500 eurosh si dhe masë mbrojtëse 6-mujore për shkak të një dënimi të mëhershëm për të njëjtën shkelje. Përveç kësaj, këtij të fundit iu konfiskua edhe vetura.

Policia Rajonale e Ferizajt ka bërë apel tek shoferët që të respektojnë rregullat e komunikacionit rrugor për të shmangur rrezikimin e jetës në trafik.