Nexhmi Muçiqi: Kërkesat elementare të qytetarëve po shpërfillen me vite

Kandidati për Asamblenë Komunale nga Partia Demokratike e Kosovës (PDK), Nexhmi Muçiqi, me numër 8, ka reaguar ndaj neglizhencës së institucioneve komunale në zgjidhjen e problemeve elementare të qytetarëve në dy Llapashticat.

Muçiqi ka theksuar se gjatë vizitave të tij në këtë zonë, është ndeshur me shumë kërkesa të banorëve, të cilat sipas tij janë punë të vogla për komunën, por me rëndësi të madhe për jetën e përditshme të qytetarëve.

“Si është e mundur që qytetari të bëjë 7 kërkesa për hapjen e një pusetë të mbyllur të kanalizimit, dhe për tri vite rresht të mos merret askush me këtë çështje?!”, ka shkruar ai.

Ai thekson se këto janë çështje që do të mund të zgjidheshin me vetëm pak angazhim nga institucionet, por për shkak të mungesës së vullnetit ato janë lënë pas dore.

Muçiqi premton se nga data 12 tetor, me ardhjen e tij në Asamble, problemet e tilla do të marrin fund, duke u zotuar se do t’i japë prioritet zgjidhjes së kërkesave të qytetarëve.