Ky është 49 vjeçari që kanosi policët (EMRI)

Një 49-vjeçar ka përfunduar në prangat e Policisë së Kosovës në Suharekë, pasi kanosi dhe ofendoi zyrtarët policorë, teksa ishte nën ndikimin e alkoolit.

Burime të Sinjalit bëjnë të ditur se gjithçka ndodhi rreth orës 18:30, kur Bislim Shala, rreth 50-vjeçar, duke vozitur makinën e tij, nisi të ndiqte një veturë policie, për t’u futur më pas në Stacionin Policor të Suharekës.

Ai filloi t’i shante e t’i ofendonte policët me arsyetimin se nuk i kishin dhënë përparësi në komunikacion. Edhe brenda stacionit, i dyshuari nuk u ndal, por vazhdoi me fyerje e kanosje ndaj zyrtarëve.

Pas testimit, rezultoi se ishte nën ndikimin e alkoolit me 1.04 promil.

Me urdhër të Prokurorit të Krimeve të Rënda, ndaj tij është hapur rast për “Kanosje”, ndërsa i dyshuari është dërguar në ndalim për 48 orë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.