A do të ketë grevë, flet Jasharaj

Kryetari i Sindikatës së Bashkuar të Arsimit Shkencës dhe Kulturës (SBASHK), Rrahman Jasharaj, ka deklaruar se ende nuk ka dialog mes tyre dhe Ministrisë së Arsimit, edhe pse një muaj më parë paralajmëruan për grevë të përgjithshme nëse deri më 20.08.2025 nuk rifillonte dialogu.

Megjithatë, Jasharaj tha se mësimi do të fillojë në shtator si dhe u përgjigj në lidhje me disa deklarata të kryesisë së SBASHK në media, në të cilat pretendohet se janë duke pritur deri më 20.09.2025 dialogun me Ministrinë e Arsimit.

“Dialog nuk ka pas edhe pse ministrja tash po merret më shumë me çështjen si deputete. Nuk ka pas komunikim, ministrja ka vazhdu ashtu si edhe kur ishte vërtetë ministre, pa qenë në detyrë, po ministre tamam në detyrën e vet, nuk ka pas dialog të mirëfilltë. Ne jemi në konsultime tash, po çështja është se çfarëdo dialog do të thotë nuk po presim sepse këta janë duke u marr më tepër me çështje të tjera” – ka thënë Jasharaj për KALLXO.com, më 20.08.2025.

Jasharaj uron se do të kenë institucione të konstituuara me të cilat do të zhvillonin dialog ose ndaj të cilave edhe do të reagonin me masa tjera.

“Në mungesë të institucioneve edhe nuk po kemi me kë të dialogojmë e as nuk po kemi kujt t’i dedikojmë protestat apo grevat. Pra, jemi në pritje dhe të urojmë që të kemi institucione, pastaj të urojmë gjithashtu që të kemi edhe dialog ngase edhe me greva po dëmtohet sistemi arsimor, po dihet”- shtoi ai.

Se çka ndryshoi pasi kërkuan rifillim të dialogut me MASHTI-n deri më 20.08.2025, Jasharaj tha se kanë menduar se do të kenë institucione të formuara deri në këtë kohë.

“Ne kemi bërë vazhdimisht kërkesa [për takim në Ministri të Arsimit] edhe me shkrim, edhe kërkesa publike. Po them, edhe kur ajo zonja Nagavci ka qenë vërtetë ministre, vazhdimisht i ka ikur takimeve dhe ne kemi bërë 5-6 shkresa që të takohemi edhe atëherë veçmas që të takohemi për kontratën kolektive që po them është pikë e nxehtë, mirëpo ajo nuk e ka pranuar asnjëherë kërkesën tonë, nuk është përgjigjur pozitivisht”- tha Jasharaj.

Sipas Jasharajt, data 20.09.2025 është përmendur nga kryesia e SBASHK-ut në media me dëshirën që së paku deri atëherë të kenë me kë të bisedojnë, pra të formohet Qeveria e re dhe të caktohet ministri i Arsimit.

“Kur do ta kemi një ministër kushdo qoftë ai, nga cilado parti qoftë, do të provojmë fillimisht dialogun por nëse dialogu nuk vlen, nuk përfillet atëherë ne do të shkojmë me veprime sindikale dhe data 20.08.2025 përmendet si e mundshme me dëshirën që të kemi institucione”- ka deklaruar Jasharaj.

“Në mungesë të dialogut, në mungesë të institucioneve, greva dhe protestat nuk mund të ndodhin, por do të ndodhin në qoftë se qeveria e re do të vazhdoj stilin e të vepruarit e të qasjes siç e kishte Qeveria Kurti që ishte një qasje tepër e gabuar, tepër e keqe dhe shpesh edhe armiqësore ndaj sindikatave, veçmas ndaj Sindikatës sonë”- shtoi ai.

Mosnënshkrimi i kontratës kolektive, pagat e mësimdhënësve në Kosovë në raport me ata në rajon dhe kushtet e punës në shkolla, janë disa nga çështjet që po i shqetësojnë sindikalistët e SBASHK-ut.

Jasharaj ka përmendur se ndonjëherë janë takuar me Taulant Kelmendin, zëvendësministrin e Arsimit, por nuk është bërë ndonjë hap pozitiv.

Kelmendi i kontaktuar nga KALLXO.com më 20.08.2025 ka thënë se do të shoh nëse kërkesat për dialog nga SBASHK janë adresuar te kabineti i tyre, por nuk ka dhënë ndonjë deklarim deri në publikimin e lajmit.

Sa i përket subvencionimit të blerjes së teksteve shkollore që po aplikohet për vitin e tretë me radhë nga Ministria e Arsimit, Jasharaj pretendon se tekstet do të vonohen pasi thotë se “veçse është vonuar hapja e mundësisë për aplikim për rimbursime, pastaj do të kemi telashe sikur dy vitet e kaluara”.

“Edhe kjo mënyra e [furnizimit] teksteve shkollore pa grevën tonë, pa protestën tonë do ta bëj të vështirë fillimin e vitit të ri shkollor, ngase do të ketë mungesë të teksteve dhe do të ketë vrapime herë në një librari herë në një tjetër të prindërve për tekstet shkollore, ndërsa mësimdhënësit do të jenë në situatë të keqe që nuk mund të fillohet procesi mësimor pas qenë së paku të furnizuar nxënësit me tekste shkollore në kohën kur po na mungojnë tabelat e menqura [në klasa]”- tha Jasharaj. /KALLXO.com