Bien pritjet në Merdare
Të shtunën, në pikat kufitare të Kosovës u regjistrua fluks i madh qytetarësh që po dilnin nga vendi, duke shkaktuar pritje të gjata, veçanërisht në pikëkalimin në Merdarë, ku në orët e paradites pritjet shkonin mbi 5 orë.
Për këtë arsye, Qendra Kombëtare për Menaxhim Kufitar u ka bërë thirrje qytetarëve të përdorin pikat e tjera kufitare, ku pritjet janë shumë më të shkurtra, në mënyrë që të shmangin tollovitë dhe vonesat.
Në përditësimin më të fundit, situata në Merdarë është përmirësuar, ku pritjet janë ulur në rreth një orë dhe kolona e automjeteve është zvogëluar në 300 metra.
Megjithatë, në pikën kufitare të Mutivodës, pritjet vazhdojnë të jenë më të gjata – deri në dy orë, ndërsa te Dheu i Bardhë qytetarët po presin rreth një orë për të kaluar kufirin. Në pikat e tjera kufitare, nuk raportohet për vonesa të theksuara.
