Ky është afaristi që u gjet pa shenja jete

Një tragjedi e rëndë ka goditur dje fshatin Korishë, ku një afarist i njohur është gjetur pa shenja jete nga familjarët e tij në rrethana tronditëse.

Burimet e Sinjalit bëjnë të ditur se viktima është Fatmir Rexhaj rreth 52-vjeçar nga fshati Korishë, i cili u gjet i vetëvarur në vilën e tij në malet e Kabashit, një vend që familja e përdorte për pushime gjatë fundjavave.

Sipas dëshmisë së familjarëve, ai deri në orën 18:00 të ditës së djeshme kishte qenë në shtëpi dhe kishte njoftuar se do të shkonte në firmën e tij “REX” në Korishë. Pasi nuk ishte lajmëruar dhe nuk ishte përgjigjur në telefon, bashkëshortja, djali dhe babai i tij fillimisht e kërkuan në objektin e firmës, por nuk e gjetën.

Ata më pas u nisën drejt vilës familjare në malin Kabash, ku i priti pamja e rëndë: Rexhaj ishte gjetur i vetëvarur në ballkonin e vilës.

Menjëherë u njoftua Policia dhe në vendngjarje dolën njësitë e hetimeve të Prizrenit, ekipi i forenzikës dhe mjekët kujdestarë që konstatuan vdekjen. Trupi i viktimës u dërgua në Institutin e Mjekësisë Ligjore për obduksion.

Hetimet për zbardhjen e plotë të rrethanave po vazhdojnë.