Ekskluzive: Sulmi i armatosur në rrugën “Dëshmorët e Kombit” – i riu u gjuajt disa herë, policia arreston të dyshuarin
Gazeta Sinjali mëson se është arrestuar një person që ishte në kërkim policor prej më shumë se dy javësh, pasi dyshohej për një tentim-vrasje të ndodhur më 6 gusht 2025 në Deçan.
Burimet bëjnë të ditur se i dyshuari është Betim Ahmataj, rreth 26-vjeçar, i cili dyshohet se ka shtënë disa herë me armë zjarri drejt bashkëmoshatarit të tij, A.T., po ashtu 26-vjeçar, por fatmirësisht nuk e ka goditur, raporton PodujevaSot.net.
Ngjarja e rëndë kishte ndodhur në rrugën “Dëshmorët e Kombit”, ku viktima kishte parkuar automjetin para një lokali. Në atë moment, i dyshuari kishte ardhur me një veturë tjetër, kishte dalë nga makina me armë në dorë dhe kishte shtënë disa herë në drejtim të tij. Nga vendi i ngjarjes Policia kishte sekuestruar disa gëzhoja, ndërsa Ahmataj kishte arritur të ikte, raporton PodujevaSot.net.
Pas kërkimeve të gjata, mbrëmë rreth orës 19:00, hetuesit e Stacionit Policor në Pejë e kanë lokalizuar Ahmatajn në një lokal në rrugën “Medlin Ollbrajt”. Ai është arrestuar dhe gjatë kontrollit i është konfiskuar një brisk flutur ngjyrë e zezë.
Në prani të avokatit të tij, i dyshuari ka zgjedhur të heshtë dhe nuk ka treguar se ku ndodhet arma e zjarrit e përdorur në rast. Me urdhër të Prokurorit të rastit, ndaj tij është shqiptuar masa e ndalimit për 48 orë, ndërsa hetimet për zbardhjen e plotë të ngjarjes po vazhdojnë.
