Blerta Deliu-Kodra akuzon RTK-në për censurë pas largimit të gazetarit Visar Krasniqi

Deputetja e PDK-së, Blerta Deliu-Kodra, ka reaguar ashpër pas raportimeve për largimin e gazetarit Visar Krasniqi nga RTK.

Ajo e ka quajtur këtë vendim “turp” dhe “censurë të pastër”, duke theksuar se televizioni publik nuk duhet të shndërrohet në instrument politik për të heshtur zërat ndryshe.

“Çfarë turpi! Censura në RTK ka zbritur nga moderatorët tek redaktorët. Largimi i Visar Krasniqit nga RTK vetëm pse citoi intervistën e Hashim Thaçit është censurë e pastër. RTK është media publike, e financuar nga qytetarët, dhe nuk mund të shndërrohet në mjet politikash për të heshtur zërat ndryshe,” ka shkruar Deliu-Kodra.

Ajo shtoi se ky rast është tregues i degradimit të lirisë së shprehjes në vend dhe i kërkoi RTK-së të mbajë përgjegjësi për veprimet e saj.