LAJMI I FUNDIT: Therje me thikë mes punëtorëve që po punonin në banesa

Një incident i dhunshëm ka ndodhur mëngjesin e sotëm në Vushtrri, ku një mosmarrëveshje mes punëtorëve ka përfunduar me therje me thikë.

Ngjarja ka ndodhur në rrugën “Hamdi Gashi”, në hapësirën e banesave të bardha që po rinovohen nga kompani private të kontraktuara nga Komuna e Vushtrrisë.

Gjatë punimeve, mes punëtorëve të dy kompanive ka shpërthyer një konflikt fizik, ku janë përdorur mjete të forta dhe një thikë. Si pasojë, tre persona kanë mbetur të lënduar.

Dy prej të dyshuarve, pas tretmanit mjekësor në Emergjencën e Vushtrrisë, janë intervistuar nga njësia e hetimeve. Ndërkaq, një tjetër i dyshuar ka marrë lëndime më të rënda dhe pas trajtimit fillestar në Spitalin e Mitrovicës është transferuar në QKUK-Prishtinë, ku gjendja e tij raportohet si e rëndë.

Në vendngjarje kanë dalë njësitë policore, hetuesit dhe forenzika, të cilët kanë vërejtur gjurmë gjaku dhe kanë sekuestruar thikën që dyshohet se është përdorur në rast.

Me urdhër të Prokurorit të Shtetit, rasti është iniciuar si “Lëndim i rëndë trupor” dhe hetimet për zbardhjen e plotë të ngjarjes janë duke vazhduar.