OVL-UÇK kërkon shkarkimin e Bashës dhe nisjen e hetimeve nga Prokuroria

Organizata e Veteranëve të Luftës (OVL) ka mbajtur një konferencë për media lidhur me publikimin e punimit shkencor të kryetarit të Kuvendit, Dimal Basha.

Kryetari i OVL-së, Hysni Gucati, ka kërkuar shkarkimin e Bashës nga pozita e kryetarit të Kuvendit dhe nisjen e hetimeve nga Prokuroria e Shtetit, duke paralajmëruar veprime të mëtejshme nëse kërkesat e tyre nuk përfillen.

“Kategoritë e dalura nga lufta kërkojnë nga deputetët shkarkimin e Dimal Bashës, dhe nisjen e hetimeve nga Prokuroria e Shtetit. Arsyet dihen: pjesëmarrja në luftë speciale propagandistike kundër UÇK-së, dhe lidhja personale dhe bashkëpunimi me persona të dyshimtë, përfshirë bashkëpunëtorë nga Maqedonia e Veriut të cilët zhvillojnë negativisht në integritetin e vendit tonë. OVL kërkon veprime të menjëhershme, iu njoftojmë se nëse nuk përfillen kërkesat tona, ne si kategori, obligohemi të ndërmarrim veprime të tjera, për të cilat do të iu njoftojmë me kohë. Në atë parti ka edhe dëshmitar të Gjykatës Speciale. Nuk kemi frikë prej askujt, do të dalin me emra, Dimal Basha le ta dinë që me kategoritë e dala nga lufta mos të na masin impulsin. Ai do të dalë humbës. Z. Basha është bashkëveprues. Nuk mund t’i ik përgjegjësisë, ai njeri e ka firmën aty. Pavarësisht cilin kapitull, ai është pjesëmarrës i atij punimi. Bashkë me këtë zonjën. Basha nuk i ka dyert e hapura në OVL, në Serbi ndoshta, jo në zyret tona, me këto shpifje e sulme ndaj UÇK-së, që nuk e dinë vlerën e shtetit”, tha Gucati.