Cakolli: Kosova po shkon me vetëdije drejt një krize të re kushtetuese

Eugen Cakolli nga Instituti Demokratik i Kosovës (KDI) ka paralajmëruar se procesi i konstituimit të Kuvendit po e shtyn vendin drejt një krize të re kushtetuese, edhe më të thellë se ajo për zgjedhjen e kryetarit të Kuvendit.

Sipas tij, pas konsumimit të të gjitha kandidaturave nga radhët e komunitetit serb, Kuvendi mund të mbetet pa asnjë çështje për të cilën të mblidhet.

“Po bëhet gjithnjë e më e qartë se vendi po shtyhet me vetëdije drejt një krize të re kushtetuese. Me konsumimin procedural të të gjitha kandidaturave nga komuniteti serb – edhe pse vetë procedura nuk është në harmoni me aktgjykimet e Gjykatës Kushtetuese – Kuvendi pas seancës së ardhshme mund të mos ketë më asnjë kandidat që mund të propozohet”, tha Cakolli.

Ai theksoi se kjo situatë do të përfundojë ose me një rast të ri në Kushtetuese, ose me zgjedhje të reja pas skadimit të afatit 30-ditor, në varësi të vendimit për kërkesën e dorëzuar nga presidentja.

Në rast se rasti shkon në Kushtetuese, Cakolli tha se skenari më i mirë do të ishte anulimi i procedurës dhe rikthimi i saj në pikën zero, me votimin e nënkryetarëve të komuniteteve në pako.

“Por në rastin më të keq, rrezikohet krijimi i një precedenti që kodifikon shumicën e dyfishtë për zgjedhjen e nënkryetarëve nga komunitetet – një skenar që duhet shmangur me çdo kusht”, tha ai.