Kryeministres italiane i publikohen foto intime, thotë se do të ketë dënime
Kryeministrja italiane, Giorgia Meloni, ka reaguar me indinjatë pas zbulimit se imazhet e saj dhe të shumë grave të tjera, mes tyre edhe figura të njohura publike, janë përdorur pa leje dhe janë shpërndarë në faqen pornografike tashmë të mbyllur Phica.eu.
Meloni e ka cilësuar këtë akt si “të neveritshëm”, duke theksuar se bëhet fjalë për një shkelje flagrante të dinjitetit dhe privatësisë së grave.
Në një prononcim për Corriere della Sera, ajo u shpreh: “Jam e neveritur nga ajo që ka ndodhur. Dua të shpreh mbështetjen time për të gjitha gratë që janë ofenduar dhe dhunuar. Është zhgënjyese të shikosh se në vitin 2025 ende ka njerëz që e konsiderojnë të pranueshme të sulmojnë gratë me fyerje seksiste dhe vulgare, duke u fshehur pas anonimitetit.”
Kryeministrja kërkoi identifikimin dhe ndëshkimin e menjëhershëm të përgjegjësve, duke rikujtuar se shpërndarja e përmbajtjes private pa pëlqim përbën krim sipas ligjit italian dhe njihet si “pornografi hakmarrjeje”.
Meloni iu bëri thirrje qytetarëve për ndërgjegjësim, edukim digjital dhe reagim të menjëhershëm në raste të tilla. Ajo theksoi rëndësinë e raportimit tek autoritetet, si Policia Postare dhe Garantuesi i Privatësisë, duke theksuar se vetëdija dhe veprimi janë armët më të mira kundër abuzimeve të tilla.
Në këtë qëndrim është bashkuar edhe motra e saj, Arianna Meloni, e cila e dënoi ashpër aktin dhe mbrojti të drejtën e grave për dinjitet dhe privatësi.
