Lajm i rëndësishëm për prindërit se çka po ndodh me subvencionet për librat?

Viti i ri shkollor nis të hënën, por shumë prindër ende nuk i kanë marrë mjetet e subvencionit nga Ministria e Arsimit. Ata thonë se, edhe pse kanë aplikuar me kohë, pagesat po vonohen dhe janë detyruar t’i blejnë librat me mjete vetanake.

Shuma prej 80 eurosh nuk po mjafton për të mbuluar të gjitha shpenzimet. Zejnie Fejzulla, nënë e një vajze në klasë të katërt, thotë se vetëm librat dhe mjetet tjera kanë kaluar këtë shumë, ndërsa subvencioni nuk i ka dalë ende, raporton PodujevaSot.net.

Edhe Lia Rudi, nëna e një vajze në klasë të tretë, shprehet se vonesat në ekzekutimin e mjeteve janë të rënda sidomos për prindërit me më shumë fëmijë. Ajo sugjeron që librat të shpërndahen drejtpërdrejt nëpër shkolla për të shmangur problemet.

Nga libraritë thonë se këtë vit interesimi është i madh. Elvim Blakaj nga “Dukagjini” thekson se prindërit janë më të përgatitur dhe shitja ka nisur më herët për të shmangur tollovitë, raporton PodujevaSot.net.

Sipas MASHT-it, deri më 27 gusht janë pranuar mbi 183 mijë aplikime, ndërsa janë ekzekutuar mbi 9.6 milionë euro për rreth 120 mijë përfitues. Megjithatë, shumë familje ende presin subvencionet.