Arrestohet 22 vjeçari, goditi të riun me shishe qelqi në kokë, ndërsa policit i shkaktoi frakturë

Një incident i rëndë është shënuar mbrëmë në Pejë, ku një i ri është sulmuar me shishe birre dhe një polic ka mbetur i lënduar gjatë tentativës për arrestimin e të dyshuarit.

Sinjali mëson se rasti është raportuar më 30 gusht 2025, rreth orës 23:30, në rrugën “Madlen Allbright”.

Sinjali mëson që i dyshuari, një 22 vjeçar, e kishte ndalur veturën e viktimës dhe e kishte goditur me shishe birre në kokë, duke i shkaktuar lëndime trupore.

Pas identifikimit, patrulla policore ka tentuar ta arrestojë të dyshuarin në rrugën “Isa Demaj”, por ai ka rezistuar dhe ka sulmuar policët. Si pasojë, njëri nga zyrtarët policorë ka pësuar frakturë në gishtin e dorës së djathtë.

Në këtë moment, ka ndërhyrë edhe një person tjetër, i cili i ka penguar zyrtarët policorë në kryerjen e detyrës.

Pavarësisht rezistencës, të dy personat janë arrestuar dhe shoqëruar në stacion policor. Viktimat janë dërguar në emergjencën e Spitalit të Përgjithshëm në Pejë, ku kanë marrë trajtim mjekësor.

Me urdhër të Prokurorit të Shtetit, ndaj të dyshuarit është iniciuar hetim për veprat “Sulm ndaj personit zyrtar” dhe “Lëndim i lehtë trupor”, ndërsa ndaj personit që pengojë policin, për “Pengim të personit zyrtar”.

Të dy janë dërguar në mbajtje për 48 orë.